| Herodotus, The Histories (XML Header) [genre: prose] [word count] [lemma count] [Hdt.]. | ||
| <<Hdt. 4.14.3 | Hdt. 4.15.3 (English) | >>Hdt. 4.17.2 |
4.15.1 ταῦτα μὲν αἱ πόλιες αὗται λέγουσι , τάδε δὲ οἶδα Μεταποντίνοισι τοῖσι ἐν Ἰταλίῃ συγκυρήσαντα μετὰ τὴν ἀφάνισιν τὴν δευτέρην Ἀριστέω ἔτεσι τεσσεράκοντα καὶ διηκοσίοισι , ὡς ἐγὼ συμβαλλόμενος ἐν Προκοννήσῳ τε καὶ Μεταποντίῳ εὕρισκον .
4.15.2 Μεταποντῖνοι φασὶ αὐτὸν Ἀριστέην φανέντα σφι ἐς τὴν χώρην κελεῦσαι βωμὸν Ἀπόλλωνος ἱδρύσασθαι καὶ Ἀριστέω τοῦ Προκοννησίου ἐπωνυμίην ἔχοντα ἀνδριάντα παρʼ αὐτὸν ἱστάναι · φάναι γὰρ σφι τὸν Ἀπόλλωνα Ἰταλιωτέων μούνοισι δὴ ἀπικέσθαι ἐς τὴν χώρην , καὶ αὐτὸς οἱ ἕπεσθαι ὁ νῦν ἐὼν Ἀριστέης · τότε δέ , ὅτε εἵπετο τῷ θεῷ , εἶναι κόραξ .
4.15.3 καὶ τὸν μὲν εἰπόντα ταῦτα ἀφανισθῆναι , σφέας δὲ Μεταποντῖνοι λέγουσι ἐς Δελφοὺς πέμψαντας τὸν θεὸν ἐπειρωτᾶν ὅ τι τὸ φάσμα τοῦ ἀνθρώπου εἴη . τὴν δὲ Πυθίην σφέας κελεύειν πείθεσθαι τῷ φάσματι , πειθομένοισι δὲ ἄμεινον συνοίσεσθαι . καὶ σφέας δεξαμένους ταῦτα ποιῆσαι ἐπιτελέα .
4.15.4 καὶ νῦν ἕστηκε ἀνδριὰς ἐπωνυμίην ἔχων Ἀριστέω παρʼ αὐτῷ τῷ ἀγάλματι τοῦ Ἀπόλλωνος , πέριξ δὲ αὐτὸν δάφναι ἑστᾶσι · τὸ δὲ ἄγαλμα ἐν τῇ ἀγορῇ ἵδρυται . Ἀριστέω μέν νυν πέρι τοσαῦτα εἰρήσθω .
ch. 16
4.16.1
| Herodotus, The Histories (XML Header) [genre: prose] [word count] [lemma count] [Hdt.]. | ||
| <<Hdt. 4.14.3 | Hdt. 4.15.3 (English) | >>Hdt. 4.17.2 |
